سەرۆكی هەرێمی كوردستان پێشوازی لە نوێنەری سەرۆكی ئەمەریكا لە هاوپەیمانێتی شەڕی دژی داعش دەكات


KRP.org | |


13/03/2017
ڕۆژی دووشەممە 13ـی 3ـی 2017 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە بڕێت مەكگورگ نوێنەری تایبەتی سەرۆكی ئەمەریكا لە هاوپەیمانێتیی نێودەوڵەتیی شەڕی دژی داعش و شاندێكی یاوەری كرد كە پێكهاتبوو لە دۆگڵاس سڵیمان باڵیۆزی ئەمەریكا لە عێراق و كین گرووس كونسوڵی ئەمەریكا لە هەولێر و جەنەڕاڵ داونسێند فەرماندەی هێزەكانی ئەمەریكا لە عێراق و ژمارەیەك ڕاوێژكاری باڵیۆزخانە و سوپای ئەمەریكا لە عێراق.

لە دیدارەكەدا نوێنەری تایبەتی سەرۆكی ئەمەریكا لە هاوپەیمانێتیی نێودەوڵەتیی شەڕی دژی داعش وێڕای ئاماژەدان بە ڕۆژی لەدایكبوونی بارزانیی نەمر و بۆنە نیشتیمانییەكانی گەلی كوردستان لە مانگی ئازار ئەوەی خستەڕوو كە جێگەی شانازییە لەگەڵ سەرۆك بارزانی و گەلی كوردستاندا كار دەكەن. جەختیشی لەوە كردەوە ئارامیی و سەقامگیریی كوردستان بۆ وڵاتەكەی جێگەی بایەخە و پەیوەست بە بارودۆخی شنگال ئەوەی ڕاگەیاند كە ئەمەریكا نایەوێ جگە لە هێزە فەرمییەكانی هەرێمی كوردستان و عێراق هیچ هێزێكی تر لەم دەڤەرە بێت.

هەر لەم دیدارەدا هەردوولا خۆشحاڵیی خۆیان نیشاندا لەوەی هەماهەنگیی نێوان پێشمەرگە و هاوپەیمانان و هێزەكانی سوپای عێراق سەركەوتن و ئەنجامی زۆر باشی لێكەوتووەتەوە.

لە بەشێكی دیكەی كۆبوونەوەكەدا پەیوەندییەكانی نێوان حكوومەتی هەرێم و بەغدا و بارودۆخی سیاسیی ناوچەكە و شەڕی تیرۆریستانی داعش لە سووریا و عێراق تاوتوێ كرا.

پەیوەندییەكانی نێوان هەرێمی كوردستان و ئەمەریكا تەوەرێكی دیكەی دیدارەكە بوو و شاندی میوان جەختیان لە بەردەوامیی وڵاتەكەیان لە پێشكەشكردنی هاوكاری بۆ هێزی پێشمەرگەی كوردستان كردەوە.




SOURCE:: KRP PAGE HIT:: 270